ერთად ვქმნით საზოგადოებას, სადაც ყველა ადამიანი მნიშვნელოვანია - მსვლელობა ქალაქში

 2 აპრილი აუტიზმის ცნობადობის  ამაღლების დღეა — თარიღი, რომელიც გვაერთიანებს საერთო მიზნის ირგვლივ, შევქმნათ  მხარდამჭერი გარემო ყველა ადამიანისთვის.

ამ დღეს 4(დ) კლასის მოსწავლეები და დამრიგებელი, სსსმ მოსწავლის ინდივიდუალური ასისტენტი, ინგა კანდელაკი,  აქტიურად გამოეხმაურნენ და საკუთარი წვლილი შეიტანეს ცნობიერების ამაღლებაში. მათ მოაწყვეს მსვლელობა ქალაქში და საინფორმაციო შეხვედრა მოქალაქეებთან, სადაც აუტიზმის შესახებ მნიშვნელოვანი გზავნილები გააჟღერეს.

მოსწავლეები მოქალაქეებს ესაუბრებოდნენ აუტიზმის არსზე, ემპათიის მნიშვნელობაზე და იმაზე, თუ რამდენად მნიშვნელოვანია თითოეული ადამიანის მიღება და მხარდაჭერა. ეს იყო არა მხოლოდ საინფორმაციო აქტივობა, არამედ ღირებული გამოცდილება თავად ბავშვებისთვისაც — მათ შეძლეს საკუთარი პასუხისმგებლობის გააზრება და საზოგადოების წინაშე აქტიური მოქალაქეობის გამოვლენა.

მსგავსი ინიციატივები განსაკუთრებულ როლს თამაშობს ინკლუზიური საზოგადოების ფორმირებაში. როდესაც ბავშვები თავად ხდებიან ცვლილებების ნაწილი, ისინი სწავლობენ თანადგომას, პატივისცემას და განსხვავებულობის მიღებას.

4(დ) კლასის ეს ნაბიჯი კიდევ ერთხელ გვახსენებს, რომ ცნობიერების ამაღლება იწყება თითოეული ჩვენგანისგან — მცირე მოქმედებებით, რომლებიც დიდ გავლენას ახდენს.